29.9.17

పాయసాన్నం

పాయసాన్నం 


కావలసిన పదార్థాలు:--
బియ్యం -- 2 కప్పులు
పంచదార -- 4 కప్పులు
నెయ్యి -- 1కప్పు
ఏలకుల పొడి -- 1 స్పూన్
జీడిపప్పు -- 50 గ్రాములు
కిస్ మిస్ -- 25 గ్రాములు

తయారీ విధానం:--
ముందుగా స్టవ్ వెలిగించి, బియ్యం కుక్కర్ లో మెత్తగా ఉడికించి, పక్కనపెట్టుకోవాలి. ఇప్పుడు ఇందులో పంచదార  వేసి మెత్తగా గరిటతో కలుపుతూ స్టవ్ మీద సన్నని మంటపై, ఉడికించితే, పంచదార అంతా కరిగి మెత్తగా పాకంలాగా వస్తుంది. ఇది ఉడికే లోపున....వేరే స్టవ్ మీద చిన్న పాత్రలో నెయ్యి వేసి, వేడిచేసి అందులో జీడిపప్పు, కిస్ మిస్ లు దోరగా వేయించి, పాయసాన్నంలో వేసి, ఏలకుల పొడి వేసి కలిపి దగ్గరగా అయిన తరవాత, దించుకోవటమే. అంతే ఎంతో రుచికరమైన తియ్యని పాయసాన్నం రెడీ.



23.8.17

రవ్వ కుడుములు

రవ్వ కుడుములు 

కావలసిన పదార్థాలు 
వరినూక(బియ్యం రవ్వ) -- 1కప్పు
శెనగపప్పు -- 2 స్పూన్స్
కొబ్బరితురుము -- 2 స్పూన్స్
జీలకర్ర -- 1/2 స్పూన్
నెయ్యి -- 2 స్పూన్స్
ఉప్పు -- రుచికి తగినంత

తయారీవిధానం

శెనగపప్పుని కడిగి 15 నిముషాలు నానబెట్టి నీళ్ళు వంపేసి ఉంచాలి. ఇప్పుడు స్టవ్ వెలిగించి, ఒక గిన్నెలో నీళ్ళు పోసి, మరిగిన తరవాత ఉప్పు & జీలకర్ర వేసి, రవ్వను వేస్తూ ఉండలు కట్టకుండా కలుపుతూ ఉండాలి. నీరు అంతా ఇంకిపోయి, రవ్వ ఉడికిన తరవాత దించి చల్లారిన తరవాత, కొబ్బరితురుము - నానబెట్టిన శెనగపప్పు - నెయ్యి వేసి, గుండ్రంని ఉండలుగా చేసుకొని, ఇడ్లీ రేకులలో ఉంచి..... స్టవ్ వెలిగించి ఇడ్లీ కుక్కర్ ను సుమారుగా 10 నిముషాలు ఉంచి ఆవిరిపెట్టి, దించుకోవాలి. అంతే వినాయకునికి ఇష్టమైన రవ్వకుడుములు రెడీ.

జిల్లేడుకాయలు

జిల్లేడుకాయలు  

కావలసిన పదార్థాలు 
బియ్యంపిండి -- 1 కప్పు 
బెల్లంతురుము -- 1 కప్పు 
కొబ్బరితురుము -- 1 కప్పు 
యాలకులపొడి -- 1/2 స్పూన్ 
నెయ్యి -- 1 స్పూన్ 
ఉప్పు -- తగినంత 

తయారీవిధానం

ముందుగా స్టవ్ వెలిగించి, ఒక గిన్నె పెట్టి నీళ్ళు పోసి, మరిగిన తరవాత, కొంచెంగా నూనె , ఉప్పు వేసి కలిపి, బియ్యంపిండిని వేస్తూ, ఉండలు కట్టకుండా తిప్పి, 2 నిముషాలు తరవాత దించుకోవాలి. చల్లారిన తరవాత చిన్న ఉండలుగా చేసుకొని పక్కన పెట్టుకోవాలి. 

ఇప్పుడు స్టవ్ వెలిగించి బాణలి పెట్టి, బెల్లంతురుము, కొబ్బరితురుము వేసి తక్కువ మంటపై ఉంచి, ఆ మిశ్రమం గట్టిపడేవరకు ఉంచాలి. చివరగా యాలకులపొడిని వేసి దించాలి. 

చేతులకు నెయ్యి రాసుకొని, ముందుగా చేసి ఉంచుకున్న ఉండలని చిన్న చపాతీలాగా చేతితోనే వత్తుకోవాలి, అందులో కొబ్బరి పూర్ణం కొంచెంగా ఉంచి, ఆ చపాతీని ఉండలుగా.... అండాకారంగా చుట్టుకోవాలి. ఇలాగ అన్నీ చేసి ఉంచుకొని... స్టవ్ వెలిగించి ఇడ్లీ రేకులలో ఈ జిల్లేడుకాయలని ఉంచి 10 నిముషాలు ఆవిరి పెట్టి, తరవాత దించుకోవాలి. అంతే జిల్లేడుకాయలు రెడీ. 

పాల ఉండ్రాళ్ళు

పాల ఉండ్రాళ్ళు 

కావలసిన పదార్థాలు 

బియ్యంపిండి -- 1 కప్పు
మంచినీళ్ళు -- 2 కప్పులు
పంచదార -- 1 కప్పు
పాలు -- 1 కప్పు
యాలకుల పొడి -- 1/2 స్పూన్

తయారీవిధానం

ముందుగా స్టవ్ వెలిగించి, ఒక మందపాటిగిన్నెలో 2 కప్పుల నీళ్ళు పోసి, మరిగిన తరవాత బియ్యంపిండి వేస్తూ, ఉండలు కట్టకుండా తిప్పుతూ, అంతా బాగా కలిసిన తరవాత, స్టవ్ మంట తగ్గించి, గిన్నె మీద మూతపెట్టి 5 నిముషాలు అయ్యాక, స్టవ్ మీద నుండి దించి, చల్లారిన తరవాత చిన్న ఉండలుగా చేసుకొని పక్కన పెట్టుకోవాలి.

ఇప్పుడు స్టవ్ వెలిగించి, బాణలి పెట్టి, పంచదార వేసి .. తగినన్ని నీళ్ళు పోసి మరిగించాలి. ఈ పాకంలో ముందుగా చేసి పక్కన పెట్టిన చిన్న ఉండలని వేసి, పాలు, యాలకులపొడిని వేసి, ఉండలకి పాలు... పాకం అంతా కలిసిన తరవాత దించెయ్యాలి. అంతే కమ్మని పాల ఉండ్రాళ్ళు రెడీ.

8.4.17

ఆలూ రోల్స్

ఆలూ రోల్స్ 

కావాలసిన పదార్థాలు 
బంగాళదుంపలు(ఆలూ) - 2
బ్రెడ్ పౌడర్ - 1 కప్పు 
ఉడికించిన పచ్చిబఠాణీ -  1 కప్పు 
సేమియా - 1/4 కప్పు 
పచ్చిమిర్చి - 3
ఉల్లిపాయ ముక్కలు - 1 కప్పు 
అల్లంవెల్లుల్లి పేస్ట్ - 1 స్పూన్ 
గరం మసాలా - 1 స్పూన్ 
నెయ్యి - 1 స్పూన్ 
కొత్తిమీర తరుగు - 1/2 కప్పు 
మైదా (లేకపోతె వరిపిండి) - 1/2 కప్పు 
మొక్కజొన్న పిండి - 1/2 కప్పు 
ఉప్పు - రుచికి సరిపడినంత 
పసుపు - చిటికెడు 
కారం - 1/2 స్పూన్ 

తయారుచేయు విధానం 
ముందుగా స్టవ్ వెలిగించి కుక్కర్ పెట్టి అందులో బంగాళదుంపల్నివేసి ఉడికించి పక్కన ఉంచుకోవాలి. చల్లారిన తరవాత పై తొక్కుతీసి మెత్తగా ముద్దగా చేసుకొని పక్కన ఉంచుకోవాలి. ఇప్పుడు స్టవ్ వెలిగించి బాణలి పెట్టి కొద్దిగా నూనె పోసి ఉడికించిన పచ్చిబఠాణీని వేయించాలి, వేగిన తరవాత అల్లంవెల్లుల్లి పేస్ట్, గరం మసాలా, ఉప్పు, మెత్తగా చేసుకున్న బంగాళాదుంప ముద్ద, బ్రెడ్ పౌడర్ వేసి బాగా కలపాలి. కొద్దిసేపు అయ్యాక కొత్తిమీర, నెయ్యిని కూడా వేసి బాగా అన్నీ కలిసేటట్టుగా చేసి కిందకి దింపి పక్కన ఉంచుకోవాలి. ఈ మిశ్రమం చల్లారిన తరవాత కోలగా రోల్స్ చేసి పక్కన ఉంచుకోవాలి.

ఇప్పుడు ఒక బౌల్ లో మైదా, మొక్కజొన్నపిండిని వేసి అందులో కొద్దిగా ఉప్పుని వేసి ఇడ్లీ పిండిలాగా చిక్కగా కలుపుకోవాలి. పక్కనే ఒక ప్లేట్ లో సేమియాని వేసి ఉంచుకోవాలి. ఇప్పుడు స్టవ్ వెలిగించి బాణలి పెట్టి అందులో రోల్స్ మునిగేటట్టుగా Deep Fry కి సరిపడినంత నూనెను పోసి, ఆ నూనె బాగా కాగిన తరవాత, పక్కన ఉంచుకున్న రోల్స్ ని మైదా మిశ్రమంలో ముంచి పక్కనే ఉన్న సేమియాలో అద్ది నూనెలో వేసి దోరగా వేయించుకోవాలి. అంతే కరకరలాడే వేడివేడి కమ్మని ఆలూ రోల్స్ రెడీ. వీటిని టమాటా సాస్ తో తింటే చాలా బావుంటాయి.     
              
  

వంకాయ పచ్చి పచ్చడి

వంకాయ పచ్చి పచ్చడి

ఈ వంకాయ పచ్చి పచ్చడి చెయ్యటానికి పెద్ద తెల్ల వంకాయలని వాడుకోవాలి. అప్పుడే పచ్చడికి రుచి బాగా వస్తుంది.  

కావలసిన పదార్థాలు 
తెల్ల వంకాయలు పెద్దవి - 2 
ఉల్లిపాయ ముక్కలు - 1 కప్పు 
పచ్చిమిర్చి - 6
అల్లం - చిన్నముక్క 
కొత్తిమీర - 1/4 కప్పు 
కరివేపాకు - రెండు రెబ్బలు 
ఉప్పు - రుచికి సరిపడినంత  
ఇంగువ - 1/4 స్పూన్  
పోపు దినుసులు
శనగపప్పు  మినపప్పు  ఆవాలు  ఎండుమిర్చి

తయారుచేయు విధానం 
ముందుగా వంకాయలని శుభ్రంగా కడిగి పక్కన పెట్టుకోవాలి. తడి ఆరిన తరవాత వంకాయలకి నూనె రాసి ఉంచుకోవాలి. ఇప్పుడు స్టవ్ వెలిగించి సన్నని మంటపై వంకాయలని అన్నివైపులా సమానంగా కాల్చుకోవాలి. కాయలు చల్లారిన తరవాత పై తొక్కని తీసేసి, లోపలి గుజ్జుని ఒక పాత్రలోకి తీసుకోవాలి. ఇప్పుడు ఈ గుజ్జుని పురుగులు లేకుండా చూసుకొని మెత్తగా చేసుకొని కొత్తిమీర, కరివేపాకు, సన్నగా తరిగి ఉంచుకున్న ఉల్లిపాయ ముక్కలు, ఉప్పు వేసి అన్నీ బాగా కలిపి పక్కన ఉంచుకోవాలి. ఇప్పుడు స్టవ్ వెలిగించి బాణలి పెట్టి నూనె వేసి పోపుదినుసులు ఒక్కొక్కటిగా వేసుకుని చిటపటలాడాక కరివేపాకు, సన్నగా చేసి ఉంచుకున్న పచ్చిమిర్చి ముక్కలు, ఇంగువ వేసి పక్కనే ఉంచుకున్న వంకాయ గుజ్జు(పచ్చడి)లో వేసి బాగా కలపాలి. అంతే వంకాయ పచ్చి పచ్చడి రెడీ. వేడి వేడి అన్నంలో కమ్మని నూనె వేసుకొని పచ్చడిని కలుపుకు తింటే ఉంటుంది......... హ్మ్మ్ నేను చెప్పటం ఎందుకు ఎలా ఉంటుందో మీరే తిని నాకు చెప్పండి. 

              

7.4.17

పాని పూరీ (గోల్ గప్పె) Pani puri (Golgappe)

పాని పూరీ (గోల్ గప్పె)   Paani Puri (Golgappe) 


కావలసిన పదార్థాలు:- 
బొంబాయి రవ్వ (గోధుమనూక) - 1 కప్పు
మైదాపిండి - 2 స్పూన్స్
అప్పడాల షోడా - 1/4 స్పూన్
ఉప్పు - రుచికి తగినంత
నూనె - 1/4 కేజీ

తయారీవిధానం:-
ముందుగా ఒక బౌల్ తీసుకొని, అందులో బొంబాయి రవ్వ, మైదాపిండి, ఉప్పు, అప్పడాల షోడా అన్నీ వేసి, కొంచెంగా గోరువెచ్చని నీరు పోసి, పూరి పిండి మాదిరిగా కలపాలి. పిండిని బాగా కలిపి, ఒక తడిబట్ట కప్పి, 30 నిముషాలు పక్కనపెట్టి నాననివ్వాలి. పిండి నానిన తరవాత చిన్న-చిన్న ఉండలుగా చేసుకోవచ్చును..... లేదా పెద్ద చపాతిలాగా వత్తుకొని, అంచు ఉన్న గ్లాస్ ఐనా, సీసా లేదా డబ్బాల మూతలు ఉన్నా చిన్న పూరీలుగా కట్ చేసుకోవచ్చును. అన్ని తయారుచేసుకున్నాక..... స్టవ్ వెలిగించి, బాణలి పెట్టి, నూనె పోసి, కాగిన తరవాత, 3 లేక 4 పూరీలను మాత్రమే నూనెలో వేస్తూ వేయించాలి. బాగా నూనె మరిగిపోకూడదు, అలాగని మరీ మంటను తగ్గించకూడదు. మీడియంలో మంటను ఉంచి పూరీలను వేయించాలి. నూనెలో వెయ్యగానే పూరీ బాగా పైకి పొంగాలి. ఈవిధంగా పూరీలను తయారుచేసి పక్కన ఉంచుకోవాలి. 


పానీపూరీలోకి పానీ తయారుచేయు విధానం
కొత్తిమీర - 1/2 కప్పు
పుదీనా - 1/2 కప్పు
పచ్చిమిర్చి - 2
నల్ల ఉప్పు - చిటికెడు
ఉప్పు - రుచికి సరిపడినంత

ముందుగా కొత్తిమీర, పుదీనా, పచ్చిమిర్చి అన్నీ కలిపి మిక్సీ లో వేసి కొద్దిగా నీరు పోసి మెత్తగా పేస్ట్ చేసుకోవాలి. ఇప్పుడు ఈ పేస్ట్ ని ఒక బౌల్ లోకి తీసుకొని ఒక టీ గ్లాసు నీరు పోసి పలుచగా చేసుకోవాలి. ఈ పానీలో నల్ల ఉప్పు, ఉప్పు వేసి బాగా కలిపి పక్కన ఉంచుకోవాలి. 

కూర తయారుచేయు విధానం 
సన్నగా తరిగి పెట్టుకున్న ఉల్లిపాయ ముక్కలు - 1 కప్పు
పచ్చిమిర్చి - 2 (చిన్న ముక్కలుగా చేసి ఉంచుకోవాలి)
టమాటా ముక్కలు- 1/2 కప్పు
ఉప్పు - రుచికి సరిపడినంత
కారం - 2 స్పూన్స్
పసుపు - చిటికెడు
జీలకర్ర పొడి - 1 స్పూన్
ధనియాల పొడి - 1/2 స్పూన్
ఛాట్ మసాలా - 1/2 స్పూన్
కొత్తిమీర తరుగు - 1/4 కప్పు
బఠాణీ - 1 కప్పు(పసుపు, ఉప్పు వేసి బాగా మెత్తగా ఉడికించి పక్కన పెట్టుకోవాలి)
బంగాళాదుంపలు - 2 (ఉడికించి తొక్కతీసి ఉంచుకోవాలి)   

ముందుగా స్టవ్ వెలిగించి బాణలి పెట్టి వేడెక్కాక 3 స్పూన్స్ నూనె వేసి, అందులో తరిగిన ఉల్లిపాయ ముక్కలు, టమాటా ముక్కలు, ఉప్పు, కారం, పసుపు, ఒక్కొక్కటిగా వేసుకుంటూ పచ్చివాసన పోయేటట్టు కొద్దిసేపు వేయించుకోవాలి, ఇప్పుడు మెత్తగా ఉడికించి పక్కన ఉంచుకున్న బఠాణీ వేసుకోవాలి, ఉడికించిన బంగాళాదుంపని చేతితో మెత్తగా చేస్తూ బాణలిలో వేసెయ్యాలి. ఈ మిశ్రమాన్ని బాగా కలుపుతూ కొద్దిగా నీరు పోసి, జీలకర్ర పొడిని, ధనియాల పొడిని వెయ్యాలి. ఇప్పుడు ఈ మిశ్రమంలో ముందుగా తయారుచేసి ఉంచుకున్న పానీని రెండు గరిటలు కలిపి, మిశ్రమాన్ని మెత్తగా గరిటతో చేసుకోవాలి. అంతే పూరీలోకి కూర కూడా రెడీ.
   
ఇప్పుడు పూరీలలో తయారుచేసిన కూరని వేసి ఉల్లిపాయ ముక్కలని, కొత్తిమీరని వేసుకొని, పానీని పోసుకొని అమాంతం నోట్లో వేసీసుకోవటమే. అంతే కమ్మని Street Food ని మనం ఇంట్లోనే తయారుచేసుకొని తినెయ్యటమే.   
                     
                      

రైస్ బాల్స్

రైస్ బాల్స్ 
రోజూ తినే రకాలే తినమంటే పిల్లలు మారాం చేస్తారుగా. అందుకే వాళ్ళకి వెరైటీ వంటకాలు రుచి చూపించండి. ఈరోజు మనం రైస్ బాల్స్ ఎలా తయారుచెయ్యాలో నేర్చుకుందాం. 

కావలసిన పదార్థాలు 
బియ్యం పిండి - 1 కప్పు 
నీరు - 3 కప్పులు 
ఉప్పు - 1/4 స్పూన్ 
కారం - 1/2 స్పూన్ 
పోపు దినుసులు 
మినప్పప్పు - 1 స్పూన్ 
శెనగపప్పు - 1 స్పూన్ 
ఆవాలు - 1/4 స్పూన్ 
జీలకర్ర - 1/4 స్పూన్ 
ఎండుమిర్చి - 2
కరివేపాకు - 2 రెబ్బలు 

తయారుచేయు విధానం 
ముందుగా స్టవ్ వెలిగించి ఒక వెడల్పాటి గిన్నెను పెట్టి 3 కప్పుల నీటిని పోసి అందులో ఉప్పు, కారం వేసుకోవాలి. నీరు బాగా మసలిన తరవాత పిండిని వేస్తూ ఉండలు కట్టకుండా తిప్పుకోవాలి. పిండి బాగా కలసిన తరవాత స్టవ్ పై నుండి దించి పక్కన ఉంచి చల్లారనివ్వాలి.  చల్లారిన తరవాత చేతికి నూనె రాసుకొని పిండిని చిన్న చిన్న ఉండలుగా చేసుకోవాలి. పిండి అంతా ఉండలుగా చేసుకుని ఒక వెడల్పాటి గిన్నెలో వేసి పక్కన ఉంచుకోవాలి. ఇప్పుడు స్టవ్ వెలిగించి ఇడ్లీ పాత్ర పెట్టి, అడుగున నీరు పోసి, ఇడ్లీ ప్లేట్లు తీసుకొని ఆ ప్లేట్లలో పిండి ఉండలని ఉంచి పాత్రని మూత పెట్టి 10 నిముషాలు ఆవిరి పట్టించాలి. లేదా కుక్కర్ లో అడుగున నీరు పోసి ఒక ఖాళీ బౌల్ ని ఉంచి దానిపైన ఉండలు ఉన్న వెడల్పాటి గిన్నెను ఉంచి కుక్కరు మూత పెట్టి విజిల్ పెట్టకుండా 10 ఆవిరి పెట్టాలి. 10 నిమిషాల తరవాత ఆ ఉండాలని తీసి పక్కన వేరే పాత్రలో ఉంచి చల్లారబెట్టాలి.      

ఈలోగా స్టవ్ వెలిగించి బాణలి పెట్టి నూనె పోసి పోపు దినుసులు అన్నీ ఒకదాని తరవాత మరొకటి వేసి చిటపటలాడాక ఇంగువ, కరివేపాకు వేసి పక్కనే ఉంచుకున్న ఆవిరి పెట్టిన ఉండలని(రైస్ బాల్స్ ని) ఆ పోపులో వెయ్యాలి. బాణలిపై మూతపెట్టి ఆ పోపు అంతా రైస్ బాల్స్ కి బాగా పట్టేంతవరకు స్టవ్ మంటని తగ్గించి ఉంచాలి. 5 నిమిషాల తరవాత బాల్స్ ని మరొకసారి బాగా కలిపి స్టవ్ పై నుండి దించి పిల్లలకి వేడి వేడిగా ప్లేట్లో వేసి ఇచ్చెయ్యటమే. వీటికి చట్నీతో పని లేదు. పిల్లలు పేచీ పెడితే ఏదైనా సాస్ వేసి ఇవ్వొచ్చును. అంతే రుచికరంగా ఉండే రైస్ బాల్స్ రెడీ. ఇంకెందుకు ఆలస్యం మీరు ట్రై చెయ్యండి.                            


బీరకాయ పచ్చడి,

బీరకాయ పచ్చడి

కావలసిన పదార్థాలు
బీరకాయ ముక్కలు - 1 కప్పు
పసుపు - చిటికెడు
ఉప్పు - రుచికి సరిపడినంత
చింతపండు - కొద్దిగా
వెల్లుల్లి - 3 రెబ్బలు
(పోపు దినుసులు)
మినపప్పు - 1/2 స్పూన్
శెనగపప్పు - 1/2 స్పూన్
ఆవాలు - 1 స్పూన్
జీలకర్ర - 1/4 స్పూన్ 
మెంతులు - చాలా కొంచెం
ఇంగువ - 1/4 స్పూన్ 
ఎండుమిర్చి - 3 (కారం ఎక్కువ కావాలి అనుకునేవారు ఎక్కువ వేసుకోవచ్చును)

తయారుచేయు విధానం 
ముందుగా బీరకాయలని శుభ్రంగా కడిగి తొక్కు తీసుకొని చిన్న చిన్న ముక్కలుగా చేసుకొని పక్కన ఉంచుకోవాలి.  ఇప్పుడు స్టవ్ వెలిగించుకుని బాణలి పెట్టి, నూనె పోసి వేడెక్కాక పోపు దినుసులు ఒక్కొక్కటిగా వేసుకొని, బాగా వేగిన తరవాత ఇంగువ వేసి దించి ఒక బౌల్ లో పోపుని ఉంచుకోవాలి. ఇప్పుడు అదే బాణలిలో మరికొద్దిగా నూనె వేసి తొక్కుతీసి ముక్కలు చేసి పక్కన ఉంచుకున్న బీరకాయ ముక్కలని వేసి ఒకసారి బాగా కలిపి, స్టవ్ మంటను బాగా తగ్గించి మూతపెట్టి ఒక 10 నిమిషాలసేపు ఉంచాలి. ముక్కలు మెత్తబడిపోతే దించి పక్కన పెట్టుకోవాలి. ఇప్పుడు మిక్సీ గిన్నెలో పోపుని, ఉప్పు, పసుపు, చింతపండు, వెల్లుల్లి రెబ్బలు అన్నీ వేసి బాగా మెత్తగా పొడి చేసుకోవాలి. ఈ మిశ్రమంలో మగ్గించి పక్కనపెట్టుకున్న బీరకాయ ముక్కలని వేసి మరొకసారి మెత్తగా రుబ్బుకోవాలి. అంతే బీరకాయ పచ్చడి రెడీ. ఇష్టమైనవారు ఈ పచ్చడిపైన కొద్దిగా నూనె వేడిచేసి మినప్పప్పు, ఆవాలు ఇంగువ వేసి పోపు వేసుకోవచ్చును, పోపు వెయ్యకపోయినా పరవాలేదు. 

(కొంతమంది బీరకాయలని తొక్కుతీసి ముక్కలని కూర చేసుకుంటారు, కానీ తొక్కుని పారేస్తారు, అలా తొక్కులని పారెయ్యకుండా ఇక్కడ మనం బీరకాయ ముక్కలతో పచ్చడిని చెప్పుకున్నాము కదా ఆ ముక్కలతో పాటుగా తొక్కుని కూడా సన్నగా తరిగి మగ్గించుకోవచ్చును. అప్పుడు అది బీరకాయ తొక్కు పచ్చడి అవుతుంది. ఆ తొక్కు పచ్చడి చేసే విధానం కూడా ఇలానే)   
                         

దోసకాయ బండ(పచ్చి) పచ్చడి

దోసకాయ బండ(పచ్చి) పచ్చడి
 

కావలసిన పదార్థాలు 
దోసకాయ ముక్కలు - 1 కప్పు 
పసుపు - చిటికెడు 
చింతపండు - చిన్న నిమ్మకాయంత 
ఉప్పు - రుచికి సరిపడినంత 
ఇంగువ - 1/4 స్పూన్ 
నూనె - పోపుకి సరిపడినంత 
(పోపు దినుసులు) 
మినపప్పు - 3స్పూన్స్, 
ఆవాలు - 1 స్పూన్ 
మెంతులు - చాల కొంచెం (దగ్గరదగ్గర 10 గింజలు వేస్తె చాలు, ఎక్కువ వేస్తె చేదు వస్తుంది.)
ఎండుమిర్చి - 3

తయారుచేయు విధానం 
ముందుగా దోసకాయలని బాగా కడిగి పైన తొక్కను తీసి కాయను రెండు ముక్కలు చెయ్యాలి. దోసకాయ లోపల ఉన్న గింజలను వేరు చేసి ఒక బౌల్ లోకి తీసుకొని ఉంచుకోవాలి.  ఇప్పుడు దోసకాయని వీలైనంత సన్నగా చిన్న చిన్న ముక్కలుగా తరుగుకోవాలి. ఇప్పుడు స్టవ్ వెలిగించి బాణలి పెట్టి అందులో పోపుకి సరిపడినంత నూనెను పోసి వేడెక్కాక మినప్పప్పు వేసి వేయించుకోవాలి తరవాత మెంతులు, ఆవాలు, ఎండుమిర్చి, ఇంగువ అన్నీ ఒకదాని తరవాత ఒకటిగా వేసుకుంటూ పోపు మాడకుండా దించి పక్కన ఉంచుకోవాలి. పోపు చల్లారిన తరవాత మిక్సీ గిన్నెలో వేసి, ఉప్పు, పసుపు, చింతపండుని వేసి బాగా మెత్తగా రుబ్బుకోవాలి. ఇప్పుడు ఈ మిశ్రమంలో దోసకాయలనుండి వేరు చేసిన గింజలని కూడా వేసి మరొకసారి మెత్తగా రుబ్బుకోవాలి. ఇప్పుడు ఈ మొత్తం మిశ్రమాన్ని సన్నగా తరుగుకొని పక్కన ఉంచుకున్న దోసకాయ ముక్కలలో వేసి బాగా కలుపుకోవాలి. ఇప్పుడు మళ్ళీ స్టవ్ పైన బాణలి పెట్టి కొద్దిగా నూనె వేసి మినప్పప్పు, ఆవాలు, ఇంగువ పోపు వేసి దోసకాయ పచ్చడి పైన వెయ్యాలి. ఎంతో రుచికరమైన ఘుమఘుమలాడే దోసకాయ బండ(పచ్చి) పచ్చడి రెడీ. 
(పచ్చడిని ముక్కలుగా తినటం ఇష్టంలేని వారు పోపుని మిక్సీలో వేసి మెత్తగా తిప్పిన తరవాత ముక్కలని కూడా వేసి ఒక్కసారి తిప్పి వెంటనే ఆపెయ్యాలి. ఆలా చేస్తే ముక్కలు సగం నలిగి నలగకుండా ఉంటాయి. ఆలా కూడా పచ్చడి బాగానే ఉంటుంది.)     
                       

కొత్తిమీర పచ్చడి

కొత్తిమీర పచ్చడి
కావలిసిన పదార్థాలు
కొత్తిమీర తరుగు - 2 కప్పులు 
పచ్చిమిర్చి - 5
చింతపండు - కొద్దిగా 
పసుపు - చిటికెడు 
ఉప్పు - రుచికి  సరిపడినంత 
ఇంగువ - 1/4 స్పూన్ 
నూనె - పోపుకి సరిపడినంత 
పోపుదినుసులు- మినప్పప్పు, శనగపప్పు, 2ఎండుమిర్చి, ఆవాలు, జీలకర్ర     

తయారుచేయు విధానం 
ముందుగా కొత్తిమీర వేళ్ళు తీసేసి, బాగా కడిగి, సన్నగా తరుగుకొని కప్పులో ఉంచుకోవాలి. ఇప్పుడు స్టవ్ వెలిగించి బాణలి పెట్టి, వేడి అయ్యాక పోపుకి సరిపడా కొద్దిగా నూనె వేసి కాగిన తరవాత, పోపుదినుసులు వేసి చిటపటలాడాక ఇంగువ వేసి దించి పక్కన ఉంచుకోవాలి. కొత్తిమీర పచ్చివాసన అంటే కొంతమంది ఇష్టపడరు అందుకని, పోపువేసిన బాణలిలోనే కొద్దిగా నూనె వేసి కడిగి పక్కన పెట్టుకున్న కొత్తిమీరని, పచ్చిమిర్చిని వేసి పచ్చివాసన పోయేంతవరకు వేయించి పక్కన పెట్టుకోవాలి. ఇప్పుడు మిక్సీలో ముందుగా పోపుని, ఉప్పు, పసుపు, చింతపండుని వేసి బాగా మెత్తగా పొడి చేసుకోవాలి. ఇప్పుడు ఈ పొడిలో కొత్తిమీరని వేసి మెత్తగా రుబ్బుకోవాలి. అంతే ఎంతో రుచికరమైన కొత్తిమీర పచ్చడి రెడీ. పచ్చడిపైన ఇష్టమున్నవారు కమ్మదనం కోసం ఎండుమిర్చి, ఆవాలు, ఇంగువ పోపు వేసుకోవచ్చును. ఈ పచ్చడి అన్నంలో కలుపుకోవచ్చు, ఇడ్లీ, దోస వంటి టిఫిన్స్ లో చట్నీలాగా కూడా వాడుకోవచ్చును. 
                  

6.4.17

వెలక్కాయ పచ్చడి & వెలక్కాయ పెరుగు పచ్చడి

వెలక్కాయ పచ్చడి

కావలిసిన పదార్థాలు
వెలక్కాయ గుజ్జు - 1 కప్పు 
పచ్చి మిర్చి - 6
పసుపు - చిటికెడు 
ఉప్పు - రుచికి సరిపడినంత 
బెల్లం  -1/4 కప్పు
కొత్తిమీర - 1 కట్ట 
ఇంగువ - 1/4 స్పూన్ 
చింతపండు - చిన్న నిమ్మకాయంత 
నూనె - పోపుకి సరిపడినంత 
పోపు దినుసులు - మినప్పప్పు, శనగపప్పు, 2 ఎండుమిర్చి, ఆవాలు    

తయారు చేయువిధానం
ముందుగా స్టవ్ వెలిగించి బాణలి పెట్టి వేడెక్కాక అందులో నూనె వేసి పోపు దినుసులను, ఇంగువను వేసి దోరగా వేయించి పక్కన పెట్టుకోవాలి. ఇప్పుడు మిక్సీలో పోపుని, ఉప్పు, పసుపు, చింతపండు, బెల్లం, కొత్తిమీర, పచ్చిమిర్చి అన్నీవేసి మెత్తగా చేసుకోవాలి. ఇప్పుడు ఈ మిశ్రమంలో వెలక్కాయ గుజ్జుని వేసి బాగా మెత్తగా రుబ్బుకోవాలి(మిక్సీలో). అంతే  కొంచెం కారముగా, కొంచెం వగరుగా , భలే రుచిగా ఉండే వెలక్కాయ పచ్చడి రెడీ. ఈ పచ్చడిని వేడివేడి అన్నంలో నెయ్యి వేసుకొని కలుపుకు తింటే ఎంత బావుంటుందో. మీరు ట్రై చేస్తారు కదూ.


వెలక్కాయ పెరుగు పచ్చడి

ఒక బౌల్ లోకి రెండు గరిటెల పెరుగు తీసుకొని ఈ పచ్చడిని కలిపి ఈ మిశ్రమంలో కొద్దిగా మినప్పప్పు, ఆవాలు , ఒక ఎండు మిర్చి, రెండు కరివేపాకు రెబ్బలు, ఇంగువ పోపు వేసి కలుపుకుంటే వెలక్కాయ పెరుగు పచ్చడి రెడీ.  

    

కంది(పప్పు) పచ్చడి

కంది(పప్పు) పచ్చడి   

కావలసిన పదార్థాలు 
కందిపప్పు - 1 కప్పు 
ఎండుమిర్చి - 6
జీలకర్ర - 1/2 స్పూన్ 
ఇంగువ - 1 స్పూన్ 
ఉప్పు - తగినంత 
పసుపు - చిటికెడు 
చింతపండు - చిన్న నిమ్మకాయంత 
నూనె - పోపుకి సరిపడినంత 
పోపుదినుసులు - ఎండుమిర్చి, ఆవాలు, జీలకర్ర, ఇంగువ 

తయారుచేయు విధానం 
ముందుగా స్టవ్ వెలిగించి బాణలి పెట్టి, బాణలి వేడి ఎక్కాక అందులో కందిపప్పుని వేసి మాడిపోకుండా దోరగా వేయించుకొని పక్కన పెట్టుకోవాలి. ఇప్పుడు అదే బాణలిలో కొంచెం నూనె వేసుకొని పోపుదినుసులని వేసి అవి చిటపటలాడాక ఇంగువ వేసి దించి పక్కనే ఉన్న కందిపప్పులో వేసుకోవాలి. కందిపప్పు, పోపు ఉన్న మిశ్రమంలో కొద్దిగా రుచికి సరిపడినంత ఉప్పు, చింతపండు, పసుపు వేసి మిక్సీ గిన్నెలో వేసి బాగా మెత్తగా పొడి చేసుకుంటూ కొద్దికొద్దిగా నీళ్ళు పోస్తూ మెత్తగా రుబ్బుకోవాలి(మిక్సీలో). ఇష్టమైనవాళ్ళు రుబ్బిన పచ్చట్లో కొద్దిగా ఆవాలు, ఎండుమిర్చి, ఇంగువ, కరివేపాకు వేసుకుంటారు. వేసుకోకపోయినా బావుంటుంది.  అంతే ఘుమఘుమలాడే కందిపచ్చడి రెడీ.